當然媽媽都會買玩具比我同細妹玩，通常係一式兩款，費事我哋會爭嘢玩，不過媽媽唔會買太多玩具，佢成日話夠就算唔好浪費啲錢。我哋亦好明白，唔會過份要求。
可能住喺半山木屋區，所以村入面嘅細路（包括我同細妹），都不愁無活動空間，而且常自制好多玩具、遊戲一齊玩。有時執起啲枯枝又當寶劍、香港小姐權杖，有時揾啲樹葉、花、什物又當煮飯仔，乜都唔駛淨係玩猜樓級、猜皇帝又得，基本上任何一樣都可以當玩具。有時媽媽突然獎我倆姊妹，一支孖條兩份分已經開心到極。
但係睇到依家啲小朋友嘅玩具就多得誇張，乜嘢款式都有，又話咩增進思考力、手感、培養音樂細胞等...很多很多林林總總，有時fong到百貨公司閒逛，都比啲玩具所吸引，好多時都有衝動買番啲比小公主玩。
但諗深一層都唔係必要嘅，而且太早比小公主學識要乜有乜嘅思想，好似唔係幾好，所以同小公主逛街，佢都會攪吓人哋啲陳列品，但佢從來唔會要求我買，除非我主動買比佢。我仍然堅持我媽媽嘅宗旨，夠玩就算唔好浪費啲錢！
