我地四點半左右去到泳池，點知去到要排隊
，可能今日實在太多人，所以泳池方面實施一出一入管制，即係有泳客走先至再俾等緊嘅泳客入塲，好彩我地排咗十五分鐘到就入到塲。入到去發覺泳池用呢個一出一入管制都係幾好，因為塲内唔會太過逼人囉，以前如果到游水旺季，入到去真係針都插唔入，都唔好講話游水呀！反而今日感覺都幾鬆動，排果十五分鐘隊都值得
。
其實我重未帶過小公主去游水架，所以今次係小公主生平第一次游水，我初初有啲擔心佢會驚架，諗住如果小公主太抗拒就走人，但見小公主入到泳池嘅反應就放心。我首先同小公主去ＢＢ池熟習，佢一落水就好開心重坐咗響度，又唔駛我地抱住佢，玩咗一陣，我就叫埋我細妹同表姐一齊去深啲果個池度。
呢個池嘅設計好似海灘咁，係慢慢斜落嘅。喺池邊水深只到腳眼，但最深果邊水深應該有個大人咁上下高，我地都係最淺水果邊玩，玩玩吓小公主又開始習慣，小公主竞然要甩開我地啲手，雖然係淺水果邊，但小公主細細粒，啲池水都浸到佢心口架！嘿！
佢真係一啲都唔驚，重自己喺度行嚟行去，間中又飲兩啖水，咳兩聲又無事喎！我覺得佢唔係好怕水，仲係度學人游蛙式用手撥水，係度話：游...游...游...。
真係好好笑！
不過臨走喺更衣室就開始扭計，因為玩得攰開始扭眼瞓，未出到更衣室門口就係我膊頭上瞓着咗，
攪到我要抱住隻豬仔番屋企，我諗小公主真係玩得好攰，我地番到屋企要幾個人一齊「巢」佢先至叫到佢起身沖身呀！
